ગુજરાતમાં ક્ષત્રિય સમાજ આ દિવસોમાં ભાજપથી ઘણો નારાજ છે. કેન્દ્રીય મંત્રી પુરૂષોત્તમ રૂપાલા સામે ક્ષત્રિય સમાજના તમામ સંગઠનોએ મ્યાનમાંથી તલવારો કાઢીને પક્ષને રૂપાલા પાસેથી ટિકિટ પાછી ખેંચી લેવાની ચેતવણી આપી છે અન્યથા ચૂંટણીમાં ગંભીર પરિણામો ભોગવવાની ચીમકી ઉચ્ચારી છે.. ક્ષત્રિય સમાજની આ નારાજગીનું કારણ પુરુષોત્તમ રૂપાલાએ તાજેતરમાં આપેલું નિવેદન છે. ભાજપે રૂપાલાને રાજકોટથી પોતાના ઉમેદવાર બનાવ્યા છે.
સૌરાષ્ટ્રમાં ઉગ્ર વિરોધ
કેન્દ્રીય મંત્રીનું નિવેદન સોશિયલ મીડિયા પર વાયરલ થતા જ ક્ષત્રિય સમાજના લોકો મેદાનમાં આવી ગયા હતા. ગુજરાતમાં ખાસ કરીને સૌરાષ્ટ્ર વિસ્તારમાં ક્ષત્રિય સમાજની મોટી વસ્તી છે અને અહીં રૂપાલાના નિવેદન સામે ભારે વિરોધ જોવા મળી રહ્યો છે. ભારતની આઝાદી સમયે સૌરાષ્ટ્રમાં 100થી વધુ નાના-મોટા રાજવી પરિવારો હતા. ગત દિવસોમાં સાબરકાંઠા, સુરેન્દ્રનગર, જૂનાગઢ, અમદાવાદ, સુરત અને અન્ય કેટલાક સ્થળોએ ક્ષત્રિય સમાજના લોકોએ જોરદાર દેખાવો કર્યા હતા. કેશોદ અને રાજકોટમાં રૂપાલાના પુતળાનું દહન કરવામાં આવ્યું છે. આગામી દિવસોમાં રાજકોટમાં ક્ષત્રિય સમાજના આગેવાનોએ રૂપાલા સામે મોટું પ્રદર્શન કરવાનું આયોજન કર્યું છે.
પુરષોત્તમ રૂપાલાએ પોતાનું નિવેદન પાછું ખેંચ્યુ
ક્ષત્રિય સમાજના જોરદાર વિરોધ બાદ પુરૂષોત્તમ રૂપાલાએ એક વીડિયો જાહેર કરીને કહ્યું કે તેઓ પોતાનું નિવેદન પાછું ખેંચે છે. તેમણે કહ્યું કે તેમનો ક્ષત્રિય સમાજ કે કોઈ રાજવી પરિવારનું અપમાન કરવાનો કોઈ ઈરાદો ન હતો અને તેઓ માત્ર અન્ય ધર્મના લોકો દ્વારા થતા અત્યાચાર વિશે જણાવવા માગતા હતા પરંતુ તેનાથી ક્ષત્રિય સમાજનો ગુસ્સો શાંત થયો નથી. માત્ર ગુજરાતમાં જ નહીં પરંતુ તેની બહાર પણ ક્ષત્રિય સમાજે પુરૂષોત્તમ રૂપાલાના નિવેદન સામે જોરદાર અવાજ ઉઠાવ્યો છે. રાજસ્થાનમાં ભાજપ સાથે જોડાયેલા ક્ષત્રિય સમુદાયના નેતા રાજ શેખાવતે એક વીડિયો જાહેર કરીને કહ્યું છે કે તેઓ પાર્ટીના તમામ પદો પરથી રાજીનામું આપી રહ્યા છે. તેમણે કહ્યું કે ભાજપ નેતૃત્વએ પુરુષોત્તમ રૂપાલા સામે કોઈ પગલાં લીધા નથી. ક્ષત્રિય સમાજ ગુજરાત જ દિલ્હી, મધ્યપ્રદેશ, છત્તીસગઢ, હરિયાણા વગેરેમાં પણ છે. આવી સ્થિતિમાં ભાજપની નેતાગીરી જાણે છે કે જો ક્ષત્રિય સમાજની નારાજગીને દૂર કરવામાં નહીં આવે તો પાર્ટીને નુકસાન વેઠવું પડી શકે છે.
સીઆર પાટીલને રાજકોટ આવવું પડ્યું
ક્ષત્રિય સમાજના સતત વિરોધ બાદ સ્થિતિ એટલી હદે વણસી હતી કે ખુદ ભાજપના પ્રદેશ પ્રમુખ સી.આર.પાટીલને રાજકોટ આવવું પડ્યું હતું. તેમણે ક્ષત્રિય સમાજના આગેવાનોના વિરોધને શાંત પાડવાનો પ્રયાસ કર્યો હતો પરંતુ સમાજના આગેવાનો ઈચ્છે છે કે ભાજપ પુરુષોત્તમ રૂપાલાની ટિકિટ પાછી ખેંચે. કોબા ખાતેની મીટીંગમાં પણ ક્ષત્રિય સમાજના આગેવાનો અડગ રહ્યા હતા અને રુપાલાની ટિકિટ રદ્દ કરવાની માંગને દોહરાવી હતી.
કોણ છે પુરુષોત્તમ રૂપાલા?
પુરુષોત્તમ રૂપાલા વિશે જણાવવાનું કે તેઓ ભાજપના વરિષ્ઠ નેતા છે અને લગભગ 5 દાયકાથી ભાજપ સાથે જોડાયેલા છે. તેઓ પાર્ટીના રાષ્ટ્રીય ઉપાધ્યક્ષ અને કિસાન મોરચાના રાષ્ટ્રીય સંયોજક રહી ચૂક્યા છે. રૂપાલા આંધ્રપ્રદેશ અને ગોવાના પ્રભારી પણ રહી ચૂક્યા છે. આ ઉપરાંત તેઓ ત્રણ વખત અમરેલી વિધાનસભાના ધારાસભ્ય અને ત્રણ વખત રાજ્યસભાના સાંસદ રહી ચૂક્યા છે. 2014માં કેન્દ્રમાં મોદી સરકાર બન્યા બાદ તેમને કૃષિ, ખેડૂત કલ્યાણ અને પંચાયતી રાજ જેવા મહત્વના વિભાગોની જવાબદારી સોંપવામાં આવી હતી.
ભાજપ શું કરશે?
મહત્વનો સવાલ એ છે કે જો ભાજપ ક્ષત્રિય સમાજને મનાવવામાં સફળ નહીં થાય તો શું લોકસભાની ચૂંટણીમાં તેની મુશ્કેલીઓ વધશે અને જો તે પુરુષોત્તમ રૂપાલાની ટિકિટ પાછી ખેંચી લેવાનો નિર્ણય કરશે તો તેને પટેલ-પાટીદાર સમાજની નારાજગીનો સામનો કરવો પડશે. . ચોક્કસપણે આ એક તરફ કૂવો અને બીજી તરફ ખાઈની સ્થિતિ છે. આ સમસ્યામાંથી બહાર આવવા માટે પાર્ટી શું નિર્ણય લે છે તે જોવું રહ્યું.